Urdu Desinged Poetry

[nizamuddin]

کون کہتا ہے محبت کی زباں ہوتی ہے

یہ حقیقت تو نگاہوں سے بیاں ہوتی ہے

وہ نہ آئے تو ستاتی ہے خلش سی دل کو

وہ جو آئے تو خلش اور جواں ہوتی ہے

روح کو شاد کرے دل کو جو پرنور کرے

ہر نظارے میں یہ تنویر کہاں ہوتی ہے

ضبطِ سیلابِ محبت کو کہاں تک روکے

دل میں جو بات ہو آنکھوں سے عیاں ہوتی ہے

زندگی اک سلگتی سی چتاہے ساحر

شعلہ بنتی ہے نہ یہ بجھ کے دھواں ہوتی ہے

(ساحر ہوشیارپوری)

زندگی تجھ سے ہر اک سانس پہ سمجھوتا کروں

شوق جینے کا ہے مجھ کو، مگر اتنا تو نہیں

(مظفر وارثی)

 

[nizamuddin]

شمع مزار تھی نہ کوئی سوگوار تھا

تم جس پہ رو رہے تھے یہ کس کا مزار تھا

تڑپوں گا عمر بھر دل مرحوم کے لئے

کمبخت نامراد، لڑکپن کا یار تھا

سودائے عشق اور ہے، وحشت کچھ اور شے

مجنوں کا کوئی دوست فسانہ نگار تھا

جادو ہے یا طلسم تمہاری زبان میں

تم جھوٹ کہہ رہے تھے مجھے اعتبار تھا

کیا کیا ہمارے سجدے کی رسوائیاں ہوئیں

نقش قدم کسی کا سر رہ گزار تھا

اس وقت تک تو وضع میں آیا نہیں ہے فرق

تیرا کرم شریک جو پروردگار تھا

(بیخود دہلوی)

بکنے والے اور ہیں جاکر خرید لو محسن

ہم لوگ قیمت سے نہیں قسمت سے ملا کرتے ہیں

(محسن نقوی)

چاہوں تو اک نظر میں خرید لوں اس کو فراز

جس کو ناز ہے کہ بکتا نہیں ہوں میں

(احمد فراز)

کس کی ہے مجال کہ ہم کو خرید سکے وصی

ہم تو خود ہی بک گئے خریدار دیکھ کر

(سید وصی شاہ)

 

[nizamuddin]

اب کے سال پونم میں


اب کے سال پونم میں جب تو آئے گی ملنے، ہم نے سوچ رکھا ہے رات یوں گزاریں گے

دھڑکنیں بچھادیں گے شوخ تیرے قدموں پہ، ہم نگاہوں سے تیری آرتی اتاریں گے

تو کہ آج قاتل ہے، پھر بھی راحتِ دل ہے، زہر کی ندی ہے تو، پھر بھی قیمتی ہے تو

پست حوصلے والے تیرا ساتھ کیا دیں گے، زندگی ادھر آجا ہم تجھے گزاریں گے

آہنی کلیجے کو زخم کی ضرورت ہے، انگلیوں سے جو ٹپکے اس لہو کی حاجت ہے

آپ زلف جاناں کے خم سنواریئے صاحب، زندگی کی زلفوں کو آپ کیا سنواریں گے

ہم تو وقت ہیں، پل ہیں، تیزگام گھڑیاں ہیں، بے قرار لمحے ہیں، بے تکان صدیاں ہیں

کوئی ساتھ میں اپنے آئے یا نہیں آئے، جو ملے گا رستے میں، ہم اسے پکاریں گے

(ناصر کاظمی)

۔۔۔۔۔۔۔۔۔۔۔۔۔۔

دل گیا تھا تو یہ آنکھیں بھی کوئی لے جاتا

میں فقط ایک ہی تصویر کہاں تک دیکھوں

اک حقیقت سہی فردوس میں حوروں کا وجود

حسنِ انساں سے نمٹ لوں تو وہاں تک دیکھوں

(احمد ندیم قاسمی)

 

[nizamuddin]

دیارِ دل کی رات میں چراغ سا جلا گیا

ملا نہیں تو کیا ہوا وہ شکل تو دکھا گیا

وہ دوستی تو خیر اب نصیبِ دشمناں ہوئی

وہ جھوٹی جھوٹی رنجشوں کا لطف بھی چلا گیا

جدائیوں کے زخم دردِ زندگی نے بھر دیئے

تجھے بھی نیند آگئی مجھے بھی صبر آگیا

پکارتی ہیں فرصتیں کہاں گئیں وہ صحبتیں

زمیں نگل گئی ہیں انہیں کہ آسماں کھا گیا

یہ صبح کی سفیدیاں یہ دوپہر کی زردیاں

اب آئینے میں دیکھتا ہوں میں کہاں چلا گیا

یہ کس خوشی کی ریت پر غموں کو نیند آگئی

وہ لہر کس طرف گئی یہ میں کہاں سما گیا

گئے دنوں کی لاش پر پڑے رہوگے کب تلک

الم کشو اٹھو کہ آفتاب سر پہ آگیا

(ناصر کاظمی)

۔۔۔۔۔۔۔۔۔۔۔۔

طلبِ عشق مٹادی ہم نے

اُس کو روکا نہ صدا دی ہم نے

خواب لوگوں نے جلا ڈالے تھے

راکھ راہوں میں اڑا دی ہم نے

(شگفتہ شفیق)

 

[nizamuddin]

آندھی چلی تو نقشِ کفِ پا نہیں ملا

دل جس سے مل گیا تھا دوبارہ نہیں ملا

ہم انجمن میں سب کی طرف دیکھتے رہے

اپنی طرح سے کوئی اکیلا نہیں ملا

آواز کو تو کون سمجھتا کہ دور دور

خاموشیوں کا درد شناسا نہیں ملا

قدموں کو شوقِ آبلہ پائی تو مل گیا

لیکن بہ ظرفِ وسعت صحرا نہیں ملا

کنعاں میں بھی نصیب ہوئی خود روئیدگی

چاکِ قبا کو دستِ زلیخا نہیں ملا

مہر و وفا کے دشت نوردو جواب دو

تم کو بھی وہ غزال ملا یا نہیں ملا

کچے گھڑے نے جیت لی ندی چڑھی ہوئی

مضبوط کشتیوں کو کنارہ نہیں ملا

(مصطفیٰ زیدی)

۔۔۔۔۔۔۔۔۔۔۔۔۔۔
نہ یہ غم نیا، نہ ستم نیا، کہ تری جفا کا گلہ کریں

یہ نظر تھی پہلے بھی مضطرب، یہ کسک تو دل میں کبھو کی ہے

(فیض احمد فیض)

 

[al_asad_al_mulk]

 

[nizamuddin]

بہت خوبصورت غزل شیئر کی ہے آپ نے۔۔۔۔۔ بہت شکریہ

 

[nizamuddin]

آج جانے کی ضد نہ کرو

یونہی پہلو میں بیٹھے رہو

ہائے! مرجائیں گے، ہم تو لٹ جائیں گے

ایسی باتیں کیا نہ کرو


تم ہی سوچو ذرا، کیوں نہ روکیں تمہیں

جان جاتی ہے جب اٹھ کے جاتے ہو تم

تم کو اپنی قسم جانِ جاں

بات اتنی میری مان لو


وقت کی قید میں زندگی ہے مگر

چند گھڑیاں یہی ہیں جو آزاد ہیں

ان کو کھو کر ابھی جانِ جاں

عمر بھر نہ ترستے رہو


کتنا معصوم و رنگیں ہے یہ سماں

حسن اور عشق کی آج معراج ہے

کل کی کس کو خبر جانِ جاں

روک لو آج کی رات کو


گیسوؤں کی شکن ہے ابھی شبنمی

اور پلکوں کے سائے بھی مدہوش ہیں

حسنِ معصوم کو جانِ جاں

بے خودی میں نہ رسوا کرو

(فیاض ہاشمی)

...................

تو جو نہیں ہے تو کچھ بھی نہیں ہے

یہ مانا کہ محفل جواں ہے حسیں ہے


نگاہوں میں تو ہے یہ دل جھومتا ہے

نہ جانے محبت کی راہوں میں کیا ہے

جو تو ہمسفر ہے تو کچھ غم نہیں ہے

یہ مانا کہ محفل جواں ہے حسیں ہے


وہ آئیں نہ آئیں جمی ہیں نگاہیں

ستاروں نے دیکھی ہیں جھک جھک کے راہیں

یہ دل بدگماں ہے، نظر کو یقیں ہے

یہ مانا کہ محفل جواں ہے حسیں ہے

(فیاض ہاشمی)

 

[nizamuddin]

کبھی کہا نہ کسی سے ترے فسانے کو

نہ جانے کیسے خبر ہوگئی زمانے کو

دعا بہار کی مانگی تو اتنے پھول کھلے

کہیں جگہ نہ رہی میرے آشیانے کو

مری لحد پہ پتنگوں کا خون ہوتا ہے

حضور شمع نہ لایا کریں جلانے کو

سنا ہے غیر کی محفل میں تم نہ جاؤگے

کہو تو آج سجالوں غریب خانے کو

دبا کے قبر میں سب چل دیئے دعا نہ سلام

ذرا سی دیر میں کیا ہوگیا زمانے کو

اب آگے اس میں تمہارا بھی نام آئے گا

جو حکم ہو تو یہیں چھوڑ دوں فسانے کو

قمر ذرا بھی نہیں تم کو خوفِ رسوائی

چلے ہو چاندنی شب میں انہیں منانے کو

(قمر جلالوی)

۔۔۔۔۔۔۔۔۔۔۔۔۔۔۔۔

آہٹ سی کوئی آئے تو لگتا ہے کہ تم ہو

سایہ کوئی لہرائے تو لگتا ہے کہ تم ہو

جب شاخ کوئی ہاتھ لگاتے ہی چمن میں

شرمائے، لچک جائے تو لگتا ہے کہ تم ہو

صندل سے مہکتی ہوئی پرکیف ہوا کا

جھونکا کوئی ٹکرائے تو لگتا ہے کہ تم ہو

اوڑھے ہوئے تاروں کی چمکتی ہوئی چادر

ندی کوئی بل کھائے تو لگتا ہے کہ تم ہو

جب رات گئے کوئی کرن میرے برابر

چپ چاپ سے سوجائے تو لگتا ہے کہ تم ہو

(جاں نثار اختر)

۔۔۔۔۔۔۔۔۔۔۔۔۔۔

ایک لمحہ کی توجہ نہیں حاصل اس کی

اور یہ دل کہ اسے حد سے سوا چاہتا ہے

(پروین شاکر)

 

[nizamuddin]

بڑا ویران موسم ہے کبھی ملنے چلے آؤ

ہر اک جانب تیرا غم ہے کبھی ملنے چلے آؤ

ہمارا دل کسی گہری جدائی کے بھنور میں ہے

ہماری آنکھ بھی نم ہے کبھی ملنے چلے آؤ

مرے ہم راہ گرچہ دور تک لوگوں کی رونق ہے

مگر جیسے کوئی کم ہے، کبھی ملنے چلے آؤ

تمہیں تو علم ہے میرے دل وحشی کے زخموں کو

تمہارا وصل مرہم ہے کبھی ملنے چلے آؤ

اندھیری رات کی گہری خموشی اور تنہا دل

دیئے کی لو بھی مدھم ہے کبھی ملنے چلے آؤ

تمہارے روٹھ کے جانے سے ہم کو ایسا لگتا ہے

مقدر ہم سے برہم ہے کبھی ملنے چلے آؤ

ہواؤں اور پھولوں کی نئی خوشبو بتاتی ہے

ترے آنے کا موسم ہے کبھی ملنے چلے آؤ

(عدیم ہاشمی)

۔۔۔۔۔۔۔۔۔۔۔۔۔۔۔۔۔۔۔۔۔۔۔
کچھ وقت کی روانی نے ہمیں یوں بدل دیا محسن

وفا پر اب بھی قائم ہیں، مگر محبت چھوڑ دی ہم نے

(محسن نقوی)

 

[nizamuddin]

ہونٹوں پہ کبھی اُن کے مرا نام ہی آئے

آئے تو سہی، برسرِ الزام ہی آئے

حیران ہیں، لب بستہ ہیں، دلگیر ہیں غنچے

خوشبو کی زبانی ترا پیغام ہی آئے

لمحاتِ مسرت ہیں تصور سے گریزاں

یاد آئے ہیں جب بھی غم و آلام ہی آئے

تاروں سے سجالیں گے رہِ شہرِ تمنا

مقدر نہیں صبح چلو شام ہی آئے

کیا راہ بدلنے کا گلہ ہم سفروں سے

جس رہ سے چلے تیرے در و بام ہی آئے

تھک ہار کے بیٹھے ہیں سرِ کوئے تمنا

کام آئے تو پھر جذبۂ ناکام ہی آئے

باقی نہ رہے ساکھ ادا دشتِ جنوں کی

دل میں اگر اندیشۂ انجام ہی آئے

(ادا جعفری)

۔۔۔۔۔۔۔۔۔۔۔۔
ایسا گم ہوں تری یادوں کے بیابانوں میں

دل نہ دھڑکے تو سنائی نہیں دیتا کچھ بھی

(احمد فراز)

 

[nizamuddin]

اب کے ہم بچھڑے تو شاید کبھی خوابوں میں ملیں

جس طرح سوکھے ہوئے پھول کتابوں میں ملیں

ڈھونڈ اجڑے ہوئے لوگوں میں وفا کے موتی

یہ خزانے تجھے ممکن ہے خرابوں میں ملیں

غم دنیا بھی غم یار میں شامل کرلو

نشہ بڑھتا ہے شرابیں جو شرابوں میں ملیں

تو خدا ہے نہ میرا عشق فرشتوں جیسا

دونوں انساں ہیں تو کیوں اتنے حجابوں میں ملیں

آج ہم دار پہ کھینچے گئے جن باتوں پر

کیا عجب کل وہ زمانے کو نصابوں میں ملیں

اب نہ وہ ہیں، نہ وہ تو ہے، نہ وہ ماضی ہے فراز

جیسے دو شخص تمنا کے سرابوں میں ملیں

(احمد فراز)

...................
پھر چھڑی رات، بات پھولوں کی

رات ہے یا بارات پھولوں کی

پھول کے ہار، پھول کے گجرے

شام پھولوں کی، رات پھولوں کی

آپ کا ساتھ، ساتھ پھولوں کا

آپ کی بات، بات پھولوں کی

نظریں ملتی ہیں، جام ملتے ہیں

مل رہی ہے حیات پھولوں کی

کون دیتا ہے جان پھولوں پر

کون کرتا ہے بات پھولوں کی

وہ شرافت تو دل کے ساتھ گئی

لٹ گئی کائنات پھولوں کی

اب کسے ہے دماغ تہمت عشق

کون سنتا ہے بات پھولوں کی

میرے دل میں سرور صبح بہار

تیری آنکھوں میں رات پھولوں کی

پھول کھلتے رہیں گے دنیا میں

روز نکلے گی بات پھولوں کی

یہ مہکتی ہوئی غزل مخدوم

جیسے صحرا میں رات پھولوں کی

(مخدوم محی الدین)

 

[nizamuddin]

بے قراری سی بے قراری ہے

وصل ہے اور فراق طاری ہے

جو گزاری نہ جاسکی ہم سے

ہم نے وہ زندگی گزاری ہے

بن تمہارے کبھی نہیں آتی

کیا مری نیند بھی تمہاری ہے

اس سے کہو کہ دل کی گلیوں میں

رات دنتیری انتظاری ہے

ایک مہک سمت دل سے آئی تھی

میں یہ سمجھا تری سواری ہے

خوش رہے تو کہ زندگی اپنی

عمر بھر کی امیدواری ہے

(جون ایلیا)

............
میں اپنے حصے کے سکھ جس کے نام کر ڈالوں

کوئی تو ہو جو مجھے اس طرح کا پیارا ہو

(پروین شاکر)

 

[nizamuddin]

تم نہ مانو مگر حقیقت ہے

عشق انسان کی ضرورت ہے

جی رہا ہوں اس اعتماد کے ساتھ

زندگی کو مری ضرورت ہے

حسن ہی حسن جلوے ہی جلوے

صرف احساس کی ضرورت ہے

اس کے وعدے پہ ناز تھے کیا کیا

اب در و بام سے ندامت ہے

اس کی محفل میں بیٹھ کر دیکھو

زندگی کتنی خوبصورت ہے

راستہ کٹ ہی جائے گا قابل

شوق منزل اگر سلامت ہے

(قابل اجمیری)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تضاد جذبات میں یہ نازک مقام آیا تو کیا کروگے

میں رورہا ہوں تو ہنس رہے ہو، میں مسکرایا تو کیا کروگے

مجھے تو اس درجہ وقت رخصت سکوں کی تلقین کررہے ہو

مگر کچھ اپنے لئے بھی سوچا، میں یاد آیا تو کیا کروگے

کچھ اپنے دل پر بھی زخم کھاؤ، مرے لہو کی بہار کب تک

مجھے سہارا بنانے والو، میں لڑکھڑایا تو کیا کروگے

اتر تو سکتے ہو یار لیکن مآل پر بھی نگاہ کرلو

خدا نہ کردہ سکون ساحل نہ راس آیا تو کیا کروگے

ابھی تو تنقید ہورہی ہے مرے مذاق جنوں پہ لیکن

تمہاری زلفوں کی برہمی کا سوال آیا تو کیا کروگے

ابھی تو دامن چھڑا رہے ہو، بگڑ کے قابل سے جارہے ہو

مگر کبھی دل کی دھڑکنوں میں شریک پایا تو کیا کروگے

(قابل اجمیری)

 

[nizamuddin]

آنکھ برسی ہے ترے نام پہ ساون کی طرح

جسم سلگا ہے تری یاد میں ایندھن کی طرح

لوریاں دی ہیں کسی قرب کی خواہش نے مجھے

کچھ جوانی کے بھی دن گزرے ہیں بچپن کی طرح

اس بلندی سے مجھے تونے نوازا کیوں تھا

گر کے ٹوٹ گیا کانچ کے برتن کی طرح

مجھ سے ملتے ہوئے یہ بات تو سوچی ہوتی

میں ترے دل میں سما جاؤں گا دھڑکن کی طرح

منتظر ہے کسی مخصوص سی آہٹ کے لئے

زندگی بیٹھی ہے دہلیز پہ برہن کی طرح

(مرتضیٰ برلاس)

۔۔۔۔۔۔۔۔۔۔۔۔۔۔۔۔
بس اب تو دامن دل چھوڑ دو بیکار امیدو

بہت دکھ سہہ لئے میں نے، بہت دن جی لیا میں نے

(ساحر لدھیانوی)