Urdu Desinged Poetry

[Shamain]

روٹھا تو شہرِ خواب کو غارت بھی کرگیا

پھر مسکرا کے تازہ شرارت بھی کرگیا

شاید اسے عزیز تھیں آنکھیں میری بہت

وہ میرے نام اپنی بصارت بھی کرگیا

منہ زور آندھیوں کی ہتھیلی پہ اک چراغ

پیدا میرے لہو میں حرارت بھی کرگیا

بوسیدہ بادبان کا ٹکڑا ہوا کے ساتھ

طوفاں میں کشتیوں کی سفارش بھی کرگیا

دل کا نگر اجاڑنے والا ہنر شناس

تعمیر حوصلوں کی عمارت بھی کرگیا

سب اہلِ شہر جس پہ اٹھاتے تھے انگلیاں

وہ شہر بھر کو وجہ زیارت بھی کرگیا

محسن یہ دل کہ اس سے بچھڑتا نہ تھا کبھی

آج اس کو بھولنے کی جسارت بھی کرگیا

(محسن نقوی)

Amazing amazing amazing, may ahmed faraz ki poem jo yahan daali hai aur yeh ghazal jo apnay share ki hai grand poetry thread urdu and hindi poetry wala us may daloon gee,acha hai achee shayari ikhatee rahay aik jaga

 

[nizamuddin]

خدا کرے میری ارض پاک پر اترے

وہ فصل گل جسے اندیشۂ زوال نہ ہو

یہاں جو پھول کھلے وہ کھلا رہے برسوں

یہاں خزاں کو گزرنے کی بھی مجال نہ ہو

یہاں جو سبزہ اگے وہ ہمیشہ سبز رہے

اور ایسا سبز کہ جس کی کوئی مثال نہ ہو

گھنی گھٹائیں یہاں ایسی بارشیں برسائیں

کہ پتھروں کو بھی روئیدگی محال نہ ہو

خدا کرے نہ کبھی خم سرِ وقارِ وطن

اور اس کے حسن کو تشویش ماہ و سال نہ ہو

ہر ایک خود ہو تہذیب و فن کا اوجِ کمال

کوئی ملول نہ ہو کوئی خستہ حال نہ ہو

خدا کرے کہ میرے اک بھی ہم وطن کے لئے

حیات جرم نہ ہو زندگی وبال نہ ہو

(احمد ندیم قاسمی)

جب ترا حکم ملا ترکِ محبت کردی

دل مگر اس پہ دھڑکا کہ قیامت کردی

تجھ سے کس طرح میں اظہار محبت کرتا

لفظ سوجھا تو معانی نے بغاوت کردی

(احمد ندیم قاسمی)

 

[nizamuddin]

وہ شخص کہ میں جس سے محبت نہیں کرتا

ہنستا ہے مجھے دیکھ کے، نفرت نہیں کرتا

گھر والوں کو غفلت پہ سبھی کوس رہے ہیں

چوروں کو مگر کوئی ملامت نہیں کرتا

دیتے ہیں اجالے میرے سجدوں کی گواہی

میں چھپ کے اندھیروں میں عبادت نہیں کرتا

بھولا نہیں میں آج بھی آداب جوانی

میں آج بھی اوروں کو نصیحت نہیں کرتا

دنیا میں قتیل اس سا منافق نہیں کوئی

جو ظلم تو سہتا ہے، بغاوت نہیں کرتا

(قتیل شفائی)

بکنے والے اور ہیں جاکر خرید لو محسن

ہم لوگ قیمت سے نہیں قسمت سے ملا کرتےہیں

(محسن نقوی)

 

[nizamuddin]

میں پا سکا نہ کبھی اس خلش سے چھٹکارا

وہ مجھ سے جیت بھی سکتا تھا جانے کیوں ہارا

برس کے کھُل گئے آنسو، نتھر گئی ہے فضا

چمک رہا ہے سرِ شام درد کا تارا

کسی کی آنکھ سے ٹپکا تھا، اک امانت ہے

مری ہتھیلی پہ رکھا ہوا یہ انگارا

جو پر سمیٹے تو اک شاخ بھی نہیں پائی

کُھلے تھے پر تو مرا آسمان تھا سارا

وہ سانپ چھوڑ دے ڈسنا یہ میں بھی کہتا ہوں

مگر نہ چھوڑیں گے لوگ اُس کو گر نہ پھنکارا

(جاوید اختر)

​

 

[nizamuddin]

تیری زلفوں کے بکھرنے کا سبب ہے کوئی

آنکھ کہتی ہے ترے دل میں طلب ہے کوئی

آنچ آتی ہے ترے جسم کی عریانی سے

پیرہن ہے کہ سلگتی ہوئی شب ہے کوئی

ہوش اڑانے لگیں پھر چاند کی ٹھنڈی کرنیں

تیری ہستی میں ہوں یا خوابِ طرب ہے کوئی

گیت بنتی ہے ترے شہر کی بھرپور ہوا

اجنبی میں ہی نہیں تو بھی عجب ہے کوئی

لیے جاتی ہیں کسی دھیان کی لہریں ناصر

دور تک سلسلۂ تاکِ طرب ہے کوئی

(ناصر کاظمی)

اک گرم آہ کی تو ہزاروں کے گھر جلے

رکھتے ہیں عشق میں یہ اثر ہم جگر جلے

پروانے کا نہ غم ہو تو پھر کس لئے اسد

ہر رات شمع شام سے لے تا سحر جلے

(غالب)

 

[HRK]

==============================================

 

[nizamuddin]

میں دل میں ان کی یاد کے طوفاں کو پال کر

لایا ہوں ایک موج تغزل نکال کر

پیمانۂ طرب میں کہیں بال آگیا

میں گرچہ پی رہا تھا بہت ہی سنبھال کر

محفل جمی ہوئی ہے تری راہ میں کوئی

اے گردش زمانہ بس اتنا خیال کر

آزاد جنس دل کو فقط اک نظر پہ بیچ

سودا گراں نہیں نہ بہت قیل و قال کر

خط کے جواب میں نہ لگا اتنی دیر تو

میرا اگر نہیں ہے تو اپنا خیال کر

کیوں میں نے دل دیا ہے کسے میں نے دل دیا

اے عقل آج مجھ سے نہ اتنے سوال کر

اے دل یہ راہ عشق ہے راہ خرد نہیں

اس پر قدم بڑھا تو ذرا دیکھ بھال کر

پھر عشق بزم حسن کی جانب رواں ہے آج

دیوانگی کو عقل کے سانچے میں ڈھال کر

آزاد پھر دکن کا سمندر ہے اور تو

لے جا دل و نظر کا سفینہ سنبھال کر

(جگن ناتھ آزاد)

........................

مجھے ڈر ہے میرے آنسو تیری آنکھ سے نہ چھلکیں

ذرا سوچ کر سمجھ کر مجھے سوگوار کرنا

(قتیل شفائی)

 

[nizamuddin]

سینہ دہک رہا ہو تو کیا چپ رہے کوئی

کیوں چیخ چیخ کر نہ گلا چھیل لے کوئی

ثابت ہوا سکونِ دل و جان نہیں کہیں

رشتوں میں ڈھونڈتا ہے تو ڈھونڈا کرے کوئی

ترکِ تعلقات تو کوئی مسئلہ نہیں

یہ تو وہ راستہ ہے کہ چل پڑے کوئی

دیوار جانتا تھا جسے میں، وہ دھول تھی

اب مجھ کو اعتماد کی دعوت نہ دے کوئی

میں خود یہ چاہتا ہوں کہ حالات ہوں خراب

میرے خلاف زہر اگلتا پھرے کوئی!!

اے شخص اب تو مجھ کو سبھی کچھ قبول ہے

یہ بھی قبول ہے کہ تجھے چھین لے کوئی!!

ہاں ٹھیک ہے میں اپنی انا کا مریض ہوں

آخر میرے مزاج میں کیوں دخل دے کوئی

اک شخص کررہا ہے ابھی تک وفا کا ذکر

کاش اس زباں دراز کا منہ نوچ لے کوئی

(جون ایلیا)

آج پھر گھر کے گھٹا آئی ہے

بہت تیز بارش کی فضا چھائی ہے

گئے برس کے ساون کا

وہ دن حسین تھا کتنا

جب ساتھ تم تھے میرے

اور تیز تیز بارش بھی

دیر تک رہی ۔۔۔۔۔

(شگفتہ شفیق)
​

 

[Shamain]

ہاں ٹھیک ہے میں اپنی انا کا مریض ہوں

آخر میرے مزاج میں کیوں دخل دے کوئی

 

[nizamuddin]

محبت کا بھرم ہوتا تو پھر کچھ سوچ کر جاتے

ورنہ زندگی بن کے میرے ہمدم گزر جاتے

تھکے ہارے پرندوں کو جو دیکھا تو خیال آیا

کوئی جو منتظر ہوتا تو ہم بھی اپنے گھر جاتے

میں کھا کر درد کی ٹھوکر ابھی تک حوصلہ مند ہوں

یہ ٹھوکر جو تمہیں لگتی تو تم خود بھی بکھر جاتے

اس تنہائی کا ہم پہ بڑا احسان ہے محسن

نہ دیتی ساتھ یہ اپنا، تو جانے ہم کدھر جاتے

(محسن نقوی)

بس اتنا یاد ہے


دعا تو جانے کون سی تھی

ذہن میں نہیں

بس اتنا یاد ہے

کہ دو ہتھیلیاں ملی ہوئی تھی

جن میں ایک میری تھی اور ایک تمہاری

(پروین شاکر)
​

​

 

[nizamuddin]

مرے خدا مجھے اتنا تو معتبر کردے

میں جس مکان میں رہتا ہوں اس کو گھر کردے

یہ روشنی کے تعاقب میں بھاگتا ہوا دن

جو تھک گیا ہے تو اب اس کو مختصر کردے

میں زندگی کی دعا مانگنے لگا ہوں بہت

جو ہوسکے تو دعاؤں کو بے اثر کردے

ستارۂ سحری ڈوبنے کو آیا ہے

ذرا کوئی میرے سورج کو باخبر کردے

قبیلہ وار کمانیں کڑکنے والی ہیں

مرے لہو کی گواہی مجھے نڈر کردے

میں اپنے خواب سے کٹ کر جیوں تو میرے خدا

اجاڑ دے مری مٹی کو دربدر کردے

مری زمیں مرا آخری حوالہ ہے

سو میں رہوں نہ رہوں اس کو بارور کردے

(افتخار عارف)

کوئی پل خوشی کا نہیں زندگی میں

اداسی ہے اتنی کہ گھبرا گئی ہوں

محبت کے موتی تجھ ہی کو مبارک

لئے خالی کاسہ میں گھر آگئی ہوں

(شگفتہ شفیق)

 

[nizamuddin]

بدنام اگر ہوں گے تو کیا نام نہ ہوگا


تقلیدِ عدو سے ہمیں ابرام نہ ہوگا

ہم خاص نہیں اور کرم عام نہ ہوگا

صیاد کا دل اس سے پگھلنا متعذر

جو نالہ کہ آتش فگنِ دام نہ ہوگا

جس سے ہے مجھے ربط وہ ہے کون، کہاں ہے

الزام کے دینے سے تو الزام نہ ہوگا

بے داد وہ اور اس پہ وفا یہ کوئی مجھ سا

مجبور ہوا ہے، دلِ خود کام نہ ہوگا

وہ غیر کے گھر نغمہ سرا ہوں گے مگر کب

جب ہم سے کوئی نالہ سر انجام نہ ہوگا

ہم طالبِ شہرت ہیں، ہمیں ننگ سے کیا کام

بدنام اگر ہوں گے تو کیا نام نہ ہوگا

قاصد کو کیا قتل، کبوتر کو کیا ذبح

لے جائے مرا اب کوئی پیغام، نہ ہوگا

جب پردہ اٹھا تب ہے عدو دوست کہاں تک

آزار عدو سے مجھے آرام نہ ہوگا

یاں جیتے ہیں امیدِ شبِ وصل پر اور واں

ہر صبح توقع ہے کہ تاشام نہ ہوگا

قاصد ہے عبث منتظرِ وقت، کہاں وقت

کس وقت انہیں شغلِ مئے و جام نہ ہوگا

دشمن پسِ دشنام بھی ہے طالب بوسہ

محو اثر لذتِ دشنام نہ ہوگا

رخصت اے نالہ کہ یاں ٹھہر چکی ہے

نالہ نہیں جو آفتِ اجرام، نہ ہوگا

برق آئینۂ فرصتِ گلزار ہے اس پر

آئینہ نہ دیکھے کوئی گلفام، نہ ہوگا

اے اہلِ نظر ذرے میں پوشیدہ ہے خورشید

ایضاح سے حاصل بجز ابہام نہ ہوگا

اس ناز و تغافل میں ہے قاصد کی خرابی

بے چارہ کبھی لائقِ انعام نہ ہوگا

اس بزم کے چلنے میں ہو تم کیوں متردد

کیا شیفتہ کچھ آپ کا اکرام نہ ہوگا

(نواب مصطفیٰ خان شیفتہ)

​

سب کچھ خدا سے مانگ لیا تم کو مانگ کر
اٹھتے نہیں ہیں ہاتھ مرے اس دعا کے بعد
(آغا حشر کاشمیری)

 

[nizamuddin]

کسی کی آنکھ جو پرنم نہیں ہے

نہ سمجھو یہ کہ اس کو غم نہیں ہے

سوادِ درد میں تنہا کھڑا ہوں

پلٹ جاؤں مگر موسم نہیں ہے

سمجھ میں کچھ نہیں آتا کسی کی

اگرچہ گفتگو مبہم نہیں ہے

سلگتا کیوں نہیں تاریک جنگل

طلب کی لو اگر مدھم نہیں ہے

یہ بستی ہے ستم پروردگاں کی

یہاں کوئی کسی سے کم نہیں ہے

کنارا دوسرا دریا کا جیسے

وہ ساتھی ہے مگر محرم نہیں ہے

دلوں کی روشنی بجھنے نہ دینا

وجودِ تیرگی محکم نہیں ہے

میں تم کو چاہ کر پچھتا رہا ہوں

کوئی اس زخم کا مرہم نہیں ہے

جو کوئی سن سکے امجد تو دنیا

بجز اک بازگشتِ غم نہیں ہے

(امجد اسلام امجد)

​

کبھی برسات میں شاداب بیلیں سوکھ جاتی ہیں

ہرے پیڑوں کے گرنے کا کوئی موسم نہیں ہوتا

بہت سے لوگ دل کو اس طرح محفوظ رکھتے ہیں

کوئی بارش ہو یہ کاغذ ذرا بھی نم نہیں ہوتا

(امجد اسلام امجد)

​

 

[nizamuddin]

دل ویراں ہے، تیری یاد ہے، تنہائی ہے

زندگی درد کی بانہوں میں سمٹ آئی ہے

مرے محبوب زمانے میں کوئی تجھ سا کہاں

تیرے جانے سے میری جان پہ بن آئی ہے

ایسا اجڑا ہے امیدوں کا چمن تیرے بعد

پھول مرجھائے، بہاروں پہ خزاں چھائی ہے

چھاگئے چاروں طرف اندھیرے سائے

میری تقدیر میرے حال پہ شرمائی ہے

(خواجہ پرویز)

محبتوں کے سفر نے اداس کر ڈالا

بدل نہ جائے کہیں یہ وہم ستاتا ہے

جو چاہوں میں کہ بھلادوں محبتیں اس کی

وہ میرے اور بھی نزدیک آتا جاتا ہے

(شگفتہ شفیق)

 

[nizamuddin]

صحرا ہی غنیمت ہے، جو گھر جاؤ گے لوگو

وہ عالم وحشت ہے کہ مرجاؤ گے لوگو

یادوں کے تعاقب میں اگر جاؤگے لوگو

میری ہی طرح تم بھی بکھر جاؤ گے لوگو

وہ موجِ صبا بھی ہو تو ہشیار ہی رہنا

سوکھے ہوئے پتے ہو بکھر جاؤگے لوگو

اس خاک پہ موسم تو گزرتے ہی رہے ہیں

موسم ہی تو ہو تم بھی گزر جاؤ گے لوگو

اجڑے ہیں کئی شہر، تو یہ شہر بسا ہے

یہ شہر بھی چھوڑا تو کدھر جاؤگے لوگو

حالات نے چہروں پہ بہت ظلم کئے ہیں

آئینہ اگر دیکھا تو ڈر جاؤ گے لوگو

اس پر نہ قدم رکھنا کہ یہ راہِ وفا ہے

سرشار نہیں ہو، کہ گزر جاؤگے لوگو

(سرشار صدیقی)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔



دل کو تری چاہت پہ بھروسہ بھی بہت ہے

اور تجھ سے بچھڑ جانے کا ڈر بھی نہیں جاتا

(احمد فراز)